Mellor sería estar calado... Pero case sempre acaba un facendo malas dixestións de tragar tanto aire...

19.11.12

Que me coma o tigre

Como xa esgotei o de "marabilloso, marabilloso", que dito así queda como algo raro, voume pasar a que me coma o tigre.
Canto máis sei do que se corta no mundo da política máis me digo, que me coma o tigre.
Isto é un despropósito atrás do outro.
Cando mellor se vai poñendo o mundo laboral máis me digo, que me coma o tigre.
Eu xa non sei onde imos ir dar.
Cantas máis incongruencias vou vendo por aí adiante, máis me convenzo, que me coma o tigre.
Isto é un non parar.

Vaime resultar ata difícil e complicado transmitir os valores que quero transmitir, porque me fallan as palabras, os discursos fan augas por todos os cornechos, boicotéanme un día si e para o outro tamén e ao final nin eu mesma creo no que estou dicindo.

Xa comecei o curso de portugués. Non o vou xulgar polas tres primeiras horas. Os comezos sempre son así un pouco estraños. Só podo dicir que creo que resultará menos aproveitable do que considerara nun principio...

E o mellor da fin de semana, á parte dos meus sobriños, un que ri por todo, un que xa razoa e outro que me dá unha de cal a bicos e unha de area a hostias (ao final é o máis sabio dos cinco, que di que si a todo e despois fai como lle peta), foi resolver a papeleta dos agasallos de Nadal, antes de que teñamos que saír na portada da Coz de Galicia co titular de "Ya le he dicho a mis hijos que esta Navidad los Reyes vendrán pobres también".
Como lles gusta aos xornais de media tinta andar de vila en vila buscando familias empobrecidas, "desestruturadas" e con problemas para sacalas na portada. Que digo eu que ben podían atallar o asunto doutro xeito e mellor podían durmir... cousa noxenta, vaia.

Arrinca a semana, levo dadas tantas puntadas que teño os dedos coma coadores, pero polo de agora éche o que hai, iso e revisar o Saramago (ou Sara Mago, como lles gusta aos señores políticos de cando en cando) na súa lingua nai.

Iso e investigar a empresa esta que anda a facerse coa sanidade e que parece que limpa, limpa, limpa non é, por moito que nolo queiran vender. Coma sempre, outra vaca no millo!

Pois a min que me coma o tigre.

Ningún comentario:

Publicar un comentario

Como as entradas están escritas desde o respecto, agradécese que os comentarios tamén o sexan...